16 May 2014

Referendum ta derecho di Pueblo Boneriano (Papiamentu)

James Finies
 Presidente i kordinado Fundashon Nos Ke Boneiru Bek

Worldatlas.com

Pueblo di Boneiru a wordu inkorpora  i integra den estado Hulandes sin su aotorisashon legal kual mester tabata un eskoho i desishon di e pueblo liber i konsiente di  tur konsekwensia  previo di su eskoho, i for di despues di 10-10-10 a drenta un epoka di divishon i inseguridat ku nunka prome no tabata e kaso.

E desunion i divishon aki huntu ku tur kambionan ku a wordu i kada dia di nobo ta wordu desidi i ta traha ley pa e pueblo Boneriano pa e gobiernu di Hulanda situa na Den Haag i kaminda ku e pueblo su bos ku ta su poder demokratiko a wordu neutralisa a krea un situashon di desesperashon i sin salida pa e pueblo.

 Nos a  splika i roga na politikonan ku a soru pa e divishon aki ku ta ‘union” ta e solushon i pa kuminsa e kaminda di rekonsiliashon di e pueblo i restorashon di e pueblo su derechonan historikamente hereda i atkeri  pa por duna e pueblo ku ta desampara un speransa nobo.
Nos Rei nobo Willem Alexander a bini, a skucha, i a komprende e situashon ku su pueblo di su Reino ta konfrontando a priminti di lo juda i a duna e pueblo un speransa nobo.

Despues di esaki  gobiernu di Hulanda a kumpli ku promesa di Rei i resien a deklara ofisialmente ku “ ku nan ta respeta nos pueblo su derecho di autodeterminsahon konforme reglanan di Nashonan Uni i awor nos mes por bai referendum i hasi un eskoho estatal nobo den Reino i nan lo respete i ku nan tin deber di juda nos i ku nan lo renegosha ku nos den kuadro di ley internashonal di igualdat, rasonabilidat, integridat i buena fe”

25 di februari Konseho Insular a uni den e moshon i desishon den su totalidat i unaninamente tur miembro a bai akuerdo ku lo mester tene un referendum pa por trese pas i trankilidat bek den e pueblo Boneriano i esaki a wordu ratifika ofisialmente  atrobe unaninamente pa tur miembro di raad riba 1 april instalando e komishon pa duna un konseho prinsipalmente na e uniko puntu di diskushon o desakuerdo ku tabatin pa sea tene e referendum prome ku elekshon o despues di evaluashon.

E pueblo Boneriano a sinti un alivio i a rebiba nan speransa pa un solushon pronto pa por duna e pueblo e oportunidat pa eherse su  derecho di  disidi su mes riba su futuro kual ta su responsabilidat i su desishon. E union i kaminda di rekonsialshon a habri di nobo i un futuro briiante mirando ku Hulanda lo juda i kopera ku deseo di e pueblo a kuminsa bira realidat.

E reunion di konseho insular siman pasa 6 mei kaminda e komishon, konsisitiendo entre otro di tres(3) eksperto legal e duna nan konseho “awor o nunka” riba e mandato di konseho insular riba e  pregunta prinispal ki dia lo tene  e referendum sea prome ku elekshon o despues di evaluashon a wordu desaproba i silensia sin ningun pregunta o remarke riba e puntu di desakuerdo kual ta e momentu adekua pa tene e referendum sea prome ku elekshon o despues di evaluashon. Niun solo momentu so e diskushon o pregunta o moshon pa ku esaki no tabata na diskushon.

 I koalishon a disidi na final den un votashon pa para e proseso i asina para e referendum i a bira lomba pa e pueblo i traishona e pueblo ku a konfia den su representanten ku nan deber ta  di proteha e pueblo i su derechonan i a bolbe kita e speransa di e pueblo ku a kuminsa sinti i kere ku e solushon tabata na kaminda i ta kibra e proseso di union i rekonsiliashon ku a kuminsa kue forma i a bolbe dividi e pueblo un biaha mas i awor e pueblo a bolbe kai den un estado di desesperashon i ta insierto di su futuro i ta riska di entrega nos pueblo su futuro den man di otronan.

Un jamada ta bai un biaha mas na direkshon di nos miembronan di konseho insular pa por rekonsidera nan posishon i tene kuenta ku nan a wordu skohe pa sali na defensa di nos pueblo i su derechonan i no lo kontrali i no por entrega esakinan bek sin autorisashon di e pueblo.  Mester tene debidamente kuenta ku e rogamentu i sklamashon di e pueblo pa debolbe esakinan bek  si no ta duna e pueblo  tambe e derecho di por eksigihi su derechonnan bek  di kualke otro forma  kual nos no ta spera ku lo mester ta e kaso si miembronan di nos konseho insular tene kuenta ku ley i nan konsenshi i aktua konforme esey.