10 March 2016

Bonaire activist wants follow-up to Bonaire referendum rejecting 'partial integration (Papiamentu)

Special to Overseas Territories Review

Address of James Finies Nos Ke Boneiru Bek

Bon nochi na : sr Gezaghebber i griffier, miembronan di konseho, deputadonan, i tur presente i na esnan ku ta sigui e reunion aki via di radio o televishon

Awe a bira un dia historiko ku ratifikashon di e resultado di e referendum di 18 desember 2015. Mi ta korda den prome karta ku Hulanda a kontestami na komienso di e lucha aki, nan a skirbi “ku ta stap voor stap nan ta traha”, awel awe nos, Boneiru, tambe a dal un stap mas den e bon direkshon. Ku ta parse chiki i simpel pero ku lo por ta e diferensia den e proseso pa rekobra nos derechonan i felisidat komo pueblo Boneriano bek. 

Pesey nos ta felisita i gradisi nos representashon di pueblo i nos gobiernu ku awe di berdat ta uni bek ku e pueblo i ofisialmente ta ratifika i rekonose i respeta e bos di pueblo.  Boso lo rekonose i respeta i seja 18 desember komo e dia ku e pueblo masalmente a lanta i eksigi un kambio, i a bai urna i a defende su mes ku su uniko arma siviko, sivilisa, i demokratiko ku ta e referendum i a disidi ku 5040 voto No, ku e No ke i No por sigui mas den e situashon ku e la bin ta biba pa 5 anja largu desde 10-10-10. Kaminda ku a bin sistematikamente ta kitando tiki tiki su derechonan i su libertatnan i a rebiba i eksperesia di nobo e dominio i opreshon di wordu goberna pa un gobiernu di un otro un pueblo. 

E mesun pueblo ku a kolonisa nos pa mas ku 300 anja a hanja e oportunidat pa bolbe hasie di nobo,naturalmente den un forma moderno.  Ami sa ku nos no gusta tende di terminonan manera kolonial, ke tene esaki taboe bao di e pueblo, pero despues di 10-10-10 nos ta den un epoka real di neokolonisashon Hulandes, i esaki no ta emoshonal. Neokolonisashon ta nifika, Hulanda ku tin e poder major ta usa manehonan ekonomiko i politiko pa indirektamente i den nos kaso asta direktamente pa influensia un otro pueblo, pues nos pueblo Boneriano. 

Ta esey ta e resultado di 10-10-10 i ta esey nos a eksperensia i ta bibando desde 10-10-10.
Nos ta na altura ku e proseso di kambio aki, ku e pueblo Boneriano sin ningun duda pa interpretashon a demanda e kambio aki, lo no ta fasil, pasobra nos counter-partner Hulanda tin demasiado medionan di poder, demokratiko, ekonomiko, finiansiero, administrativo, edukativo i legal nan su bentaha pa e logra lokual ku Hulanda ke i nos alkontrario a perde kasimente tur.  

Pero awor ku e deseo i desishon i mandato di e pueblo nos ta den posibilidat pa kambia e posishon aki, pueblo a papia i mester respeta mandato i bos di pueblo. Hulanda sigur lo bai na respeta esaki, pasobra Hulanda no por bisa o para riba mas ku “ta boso mes skohe” i “ta boso mes gobiernunan di diferente konstelashon no kier kambia e rumbu aki” 

Pa nos komo Boneiru logra mas i pa nos derechonan wordu respeta nos mester di tur  judansa posibel den e proseso i trajekto aki. Ku esaki nos kier ta spesifiko ku pa logra mas ku Hulanda nos mester di eksplora e posibilidat di involvi instansianan pafor di Boneiru i forma aliansa formal i informal ku otronan den situashon semejante ku nos riba diferente nivel. Si komprende e manera pa konkista i domina un pueblo ta di dividie i esey esnan ku no kier e pueblo aki bon a hasi i lo sigui hasi, dividi nos, i esey nos a bibe pa anjos i a trese nos den e situashon aktual, i nos a sinja di esaki i mira nos a sa di para riba politika i a uni i awe e reunion aki ta resultado di e union aki. 

E tema referendum i derecho di pueblo ta para riba politika. No tin un Boneiru kolo berde, ni kora, ni blou, ni tur e otro kolonan, pero ta un Boneiru nos tin. Pesey por ehempel nos lo mester hasi esfuerso pa uni ku Sint Eustatius ku ta den mesun lucha ku nos, tambe buska aserkamentu ku nos otro rumannan den Reino, tambe riba nivel internashonal, pues varios kaminda ku por juda nos kausa Boneriano.

Den e parti aki nos di Nos Ke Boneiru Bek, nos kier juda un tiki mas, pa juda ku e voto No di e pueblo lo hanja mas forsa pa trese e kambionan nesesario, i ku boso bendishon, ku por ta formal o no-formal, nos kier tuma e inisiativa pa entre otro juda buska posibilidatnan pa reforsa e kausa Boneriano. Un ehempel ta e desishon ku konseho insular a tuma kaba na 2014 i a manda karta pa Hulanda ku e petishon aki, pa re-enskribi nos komo teritorio-sin-propio-gobernashon riba lista di Nashonan Uni i nos ke tuma inisiativa pa eksplora esaki. Den e kaso aki NKBB komo un organisashon independiente, gobiernu lo no ta responsabel pa nos akshonan i ta safe i si nan ta na agrado o ta juda, gobiernu por use sea formal o no-formal, ofisial o no-ofisial pasobra e lo benefisio nos tur. I si no ta e kaso no tin ningun responsabilidat di parti gobiernu mara na esaki.

 Ku otro palabra gobiernu i nos representante nan di pueblo lo tin e ultimo palabra.  I nos ta di opinion ku esaki lo promove i sigui engrandese e union ku ta e kaminda pa nos eksito pasobra nos tur lo sigui lucha i trahando i aspirando lo mehor pa e pueblo Boneriano. 

Si nos logra hanja e aliansa o koperashon i nos kaso jega na e nivel ey, sigur lo juda nos den nos posishon ante Hulanda, pueblo Boneriano a vota na nivel di pueblo, “no”, pueblo no a skohe pa esaki, i awor a skohe i eksigi un kambio. I ku respaldo na e nivel ey, nos lo por tin mas posibilidatnan nobo. Hulanda lo sa di respeta nos union i e akuerdonan di e komunidat internashonal pasobra ta e mes a bai di akuerdo ku esaki nan.                                                    

Por ultimo nos ta di opinion ku nos tin e derechonan aki kaba, ta buska nos tin ku buska pa realisa esakinan, di un manera o otro. Pueblo Boneriano no ta dividi mas, nos a uni, esey a sosode 18 desember i awe boso ta ratifika i rekonose i duna respet na esaki i nos por sigui padilanti huntu, nos tur uni ku e mesun meta, pa realisa nos derechonan ku mester soru pa trese bek bienestar i felisidat pa e pueblo Boneriano.

Danki i bon nochi.

James Finies, Nos Ke Boneiru Bek.  

Speech James Finies di NKBB den konseho insular reunion 23 feb 2016 tokante referendum ((Papiamentu)

Special to Overseas Territories Review


worldatlas.com

Statement by 
James Finies, Nos Ke Boneiru Bek 

Bon nochi na : sr Gezaghebber i griffier, miembronan di konseho, deputadonan, i tur presente i na esnan ku ta sigui e reunion aki via di radio o televishon

Awe 23 di februari sigur ta un dia importante pasobra ta bai diskuti riba e topiko resultado di referendum. Pues e derecho esklusivo di nos pueblo pa por disidi su mes riba su futuro.  Esaki ta e derecho di outo determinashon di e pueblo Boneriano ku ta un derecho humano ku ta pertenese na ami i tur otro Boneriano.

Den e kaso aki , e topiko di referendum, ta un kaminda basta largu a kana , hopi kos a okuri, ku e 5 minuut aki nunka lo jega pa relata tur lokual ku e representashon di e pueblo Boneriano i nan gobiernunan a presta riba e tereno aki desde 2004 bini ariba ku a kulmina na 10-10-10 den destrui i desmantela e pais Antias. Den nos kaso kreashon di e struktura estatal aktual, entegrando nos parsialmente i hinkando nos den konstitushon Hulandes bao di artikulo 134 komo Entidat Publiko, komo islanan BES. BES ku ta inklui tambe Saba i Statia, pues e islanan mas chiki i vulnerabel di e pais i pueblo Antiano, Hulanda a aneksa e islanan aki bao di preshon, i a hinka nos den e struktura temporal aki pa 5 anja. I esaki kontra voto demokratiko di e pueblo di Statia i tambe sin aprobashon legal di e pueblo Boneriano, ku nunka tabata na altura di e konsekuensia di `nan eskoho. Esaki violando i trapando e base di ley internashonal konserniendo derechonan fundamental di outodeterminashon. 

I ku e struktura aki lo keda vigente te ku 2015 ora evalua, lokual ku a sosede ku resultado konosi, ku obviamente tabata un frakaso i nos gobiernu a wordu deskribi den e raport aki komo esun ku prinsipalmente a hanja mayoria kulpa den esaki. Awor mester bai na disidi i traha riba un struktura definitivo.

Resumiendo en korto:

-E resultado di referendum di 2004 i akuerdonan politiko pa e struktura BES despues di 10-10-10  nunka tabatin un fundamento o base legal di akuerdo ku ley internashonal, e pueblo nunka tabata na altura di konsenkuensia di su eskoho i nunka a ratifika o legalisa esaki.                           -E 

resultado di referendum di desember 2010 pueblo demokratikamente a rechasa e inkorporashon den e konstitushon Hulandes bao di artikulo 134. Raport di mesun Boersma ku awe sigur ta tema di diskushon a raporta negativo riba esaki i aun mas peor ta ku e supervishon di Nashonan Uni, Sra Luethy, ku a bisami personalmente den un kombersashon ofisial, pero a pidimi pa nunka ripiti e kombersashon ey, pasobra ku e lo bai raporta tambe negativo kontra e referendum ey, te ku awe e raport aki no a mira lus di dia. Ni Boneiru ni Hulanda ni Nashonan Uni no tin e raport aki, anto awe ke bai diskuti tokante raport? Esaki no ta aseptabel i tambe nada otro ku lo bai kontra bos i eskoho demokratiko di e pueblo Boneriano. E 5040 votonan NO mester wordu respeta!                                                            

-Ku e resultado di e referendum di 18 desember 2015, pueblo demokratikamente a rekonfirma su posishon ku e no ta di akuerdo ku e kontenido ku a wordu duna na su eskoho sin kontenido di referendum di 2004. Esaki ta e uniko konklushon di e resultado, no purba na inteprete di ningun otro forma, pasobra si e pueblo a vota Si, awe henter e proseso i struktura ku nos ta den awe Si lo a bira legal. Pesey e eskoho No, 66% a rechasa esaki i awe e struktura aki no tin base legal definitivamente i ta ilegal, pasobra e no tin aprobashon di e pueblo. Esaki ta komprendibel?
O kon tin ku hasie komprendibel pa esnan ku no kier komprende esaki, espesialmente oposishon ku a kampanja pa Si, ku parse ta aki awe ku e intenshon pa kuestiona i ke kambia e desishon di pueblo?                                                                                                                      
-E mesun situashon igual ku na St Eustatius a inkorpore tambe den struktura BES i konstitushon Hulandes tambe kontra deseo i eskoho demokratiko di e pueblo Statiano.              -Ku na St Eustatius, desember 2014 a tene un referendum di struktura estatal kaminda dos  tersera parti a vota pa outonomia den Reino Hulandes pero ku indikashon di praktikanan di boicot di referendum meskos ku esun di Boneiru di 2010 i 2015.                                                               - Meskos a purba tur sorto di manera pa boycot esun di  Boneiru di18 desember tambe. I e pueblo ku 5 anjana largu a sufri, i boso tur uniko kos ku boso por a bisanan, 5 anja largu, no ta nos, ta Hulanda, nos no por hasi nada, awor boso a hanja kurashi , a uni, i duna e pueblo oportunidat pa usa su poder. I e pueblo a bisa ta basta. I awor kier kambia o hunga politika ku e resultado? Ta problema ta buskando?                                   
-Ku e gobiernu nobo di St Eustatius a ratifika e resultado di nan referendum ku a wordu boicota i lo mester kumpli ku bos i deseo di e pueblo.                                                                  

 -Ku e dos pueblonan di Boneiru i St Eustatius a demonstra konbensientemente i demokratikamente ku nan no ta felis ku e situashon ku a hinka nan den despues di 10-10-10 i a vota kontra e status aktual ku Hulanda den nan referendumnan.
Awor e pregunta na boso, apesar ku boso a eksperensia, pues biba e disgustu i rabia bao di e pueblo Boneriano, ku a protesta, manifesta, hasi tur sorto di kos pa demonstra esaki pa e ultimo anjanan, ku boso no ta rekonose ku henter e situashon ku nos ta den aki ta uno illegal? Ku e no tin ningun fundeshi legal pa sigui persisti ku ne? Ku boso tambe siguiendo ku e rumbo aki ta violando leynan i trapando derechonan fundamental di e pueblo Boneriano? 

Hasi politika ku referendum pa partido i puesto i poder, ta hungando ku e derechonan i futuro i destino di e pueblo aki.
Mi kier pa rekorda boso ku boso a wordu eskohe pa e pueblo pa represente i defende su derechonan i no pa entega o kita esakinan for di dje, loke a okuri desde 10-10-10. Kaminda a entrega e pueblo su derechonan i su poder demokratiko i asta boso poder pa representa boso pueblo den man bek di e mesun ku a kolonisa nos. I nos tur a re-biba nos historia kolonial di nobo, na un forma moderno, pues kiko ta nifika pa wordu domina i oprimi, di nobo, nos a eksperiensa e desesperashon i inkapasidat di gran parti di nos pueblo kaminda mayoria di nan a entrega. Asta boso mes no tabata mira salida for di e trampa ku nos ta den aki, e jamada pa un referendum a dune e pueblo un speransa bek, nos lucha i sakrfisio sobre-humano pa por juda konvense boso pa duna e pueblo e oportunidat, su derecho pa papia. 

I awor pueblo su bos a resona i a duna boso bek e mandato legal demokratiko pa tuma nos poder bek i asina boso por ta esnan responsabel pa juda e pueblo rekobra su prosperidat i felisidat bek. Ta esaki ta bai diskuti ku e referendum ku esaki tin balides? 

Nos lo no asepta esaki di ningun forma. I pa rekorda o refreska memoria o pa esnan ku no sa, ku referendum ta un mekanismo demokratiko ku a wordu implementa, despues di segunda guera mundial, pa evita guera i promove pas, i ta na lugar di guera pa un pueblo por defende su mes na un manera siviko. I nos tur ta bon na altura ku bida di hende mester wordu respeta i esun ku kita esaki for di e otro ta un kriminal ku lo wordu persigui i kondena.

Pero ku den guerra esaki si ta posibel pa kita bida di e otro legalmente, pues esey nifika un referendum. Evita ku nos mester jega dje lew ey ku nos tin defende nos libertat ku nos bida, pasobra esaki tambe ta nos derecho i ta legal pa por defende nos derecho i libertat ku tur medio posibel.

Apesar di dokumentonan, raportnan, analisnan di ekspertonan legal, ets, pero parse ku politika, puesto i poder, ta mas importante ku ley i derecho, ta pesey nos ta bai na e nivel aki awe, pa rekorda, ku si nos sakrifisio no tabata basta i sufisiente pa bira konsiente kiko ta posibel ora hende ta kapas pa hasi, ora sin interes o agenda den nada, solamente pa protega su derecho i libertat i pa por pasa esakinan pa su siguiente generashonan, i ku ta boso ta responsabel, pasobra referendum ta uniko responsabilidat ku por juda e pueblo Boneriano ku boso a keda ku ne despues di 10-10-10, i ta boso ta responsabel si mester bai na sakrifika mas pa nos derechonan i nos libertat wordu respeta i rekobra i restora.

Pueblo a papia, 5040 voto NO, no por tin ningun duda riba esaki hamas , niun otro impretashon, ni tampoko purba kamoufla i o bini ku ningun maniobra pa tene e pueblo den e mes un estado aki kaminda e ta wordu domina i oprimi i ta infelis. Pues nos ta roga boso, pa komprende ku e asuntu aki ta hopi serio i ta para riba ego personal o politika partidista i ta pa e pueblo Boneriano den su totalidat.

Sperando ku boso lo refleha i boso konsenshi guia boso direkshon kaminda hustisia i derecho di e pueblo Boneriano lo prevalese den boso desishonan awe i padilanti ku lo ta determinante pa nos futuro i nos destino.

Danki i bon nochi.


See Also:

Self-determination referendum for Bonaire being sabotaged


Bonaire group petitions for self-determination referendum




Bonaire Government requests U.N. listing as non self-governing territory